ꂘꃀ

                 《ꁱꉠꆏꋍꏅꂘꃀꁵꌠꊪꄯꒉꁬꉬ》



                                    老师

              《写给我所有老师的一封信》
                                ꄸꌺꈌꈬ  ꁱ
ꉂꇀꅉꌠꂘꃀꀋ,

ꉢꐣꁙꀵꌋꁱꂷꌶꄹꉈ,

ꂘꃀꆏꂘꅇꂷꀘꇮꁱꇮꇀꄮꇬ,

ꂘꃀꆏꁁꅪꆽꈜꉢꄀꄈꄮꇬ，

ꁈꁧꇂꃴꉆꄉꅇꏤꒂꄮꇬ ，

ꌕꑵꃪꌠꈀꁠꁵꄹꉇ，

ꇇꁮꍠꀕꏪꌠꆹ ，

ꉂꇀꅉꌠꂘꃀꉬ。

 

ꂘꃀꅽꇇꁮꏪꃚꈨꇀꇬ，

ꑋꆳꆳꌙꀕꃄꁏꌠꏭꀋꋌ，

ꉪꊇꌶꅉꈓꉈꐺꄮꇫ，

ꉪꊇꅳꀧꍔꄉꆏꅇꅲ，

ꂘꃀꆏꑍꆏꉆꐞꄙꄈꈌꃴꉐꃴꈤ，

ꌋꐔꂘꊭꂘꄏꎭ，

ꂘꃀꆏꆹꋌꑍꄸꎭꅧꄹꋻ，

ꉪꊈꌧꇐꀺꎆꆸꄮꇬ，

ꉌꃀꇿꌠꂘꃀꆏꂷꐥ，

 ꑋꇁꑿꐥꁯꆮꃳꆫꌠꉌꌒꊐ，

ꆧꃅꆧꅿꆣꅊꀕꌌꁈꉌꌒꊐ，

ꁡꇤꈀꋦꉘꁇꑘꃅꃰꊿꉌꌒꊐ，

ꉂꇁꑟꌠꆀꃅꂘꃀꆎꂷꆹ，

ꈌꃨꌌꁈꈌꃨꇂꁮꈹꅉꉜꌠꌡ，

ꃆꇭꌌꁈꃆꇭꃧꅉꉜꌠꌡ，

ꂘꃀꆎꆹꁦꀑꎺꁧꌟꃅꆳꇁꉏꇨꑌꄡꋻ，

ꂘꃀꆏꆹꒉꋮꇓꂵꌠꃅꒉꇁꉏꇨꑌꄡꋻ，

ꂘꃀꆏꆹꎭꀋꐒꅧꀋꐒꃅ，

ꌧꇐꁰꀕꆏꈁꌧꈁꈻꈧꌠꆹꆏꌌꉪꊇꂘꌐꃲ，

ꉂꇀꅉꌠꂘꃀꇆ，

ꋍꈓꇈꋍꈓꆏꆹꐤꅉ꒜ꅉꑟꀐ，

ꄚꅽꌧꇐꁱꀕꆹꐤꅉꏀꅉꑟꆹ，

ꀃꑍꆹ，ꉪꊇꅽꐰꄉꌧꇐꁱꀕꌷ，

ꃆꏂꊂꑋꆏꉪꊇꆃꎭꆈꌠꐥꐨꀊꏀꋉꄻꂯ，

ꀃꑍꉪꊇꆹꒈꐂꃪꐂꄉꌧꇐꂿꇐꌷ，

ꆀꃅꇕꈌꁦꀑꁧꄩꉆꄉ，

ꆀꃅꁧꐙꁦꄵꇈꈴꄉ，

ꆃꎭꀊꏀꋈꄻꂯ，

ꉷꃅꇓꈓꉆꄉꄂꄑꃅꏸꋦꅉꉜꁧꂯꑌ，

ꀉꑳꃅꇢꉌꃀꆀꃅꎍꇈꃲ，

ꉂꇁꅉꌠꆀꃅꂘꃀꑠꂷꑌ，

ꉡꆹꈍꃅꂘꃀꑆꊋꀱꌐꇁꉆꂯꇆ，

ꃅꃴꄂꏂꄂꅪꒃꄉꂘꃀꑆꊋꀱꂿꂸ:

ꌧꇐꁱꀕꌷꄉꂘꃀꑆꊋꊼꇅꎺꄅꂿ，

ꉢꆹꃱꇌꌟꃅꃢꎔꈚꎔꈚꄉ，

ꌧꇐꁱꀕꀋꃷꎵꃅꋍꇅꌷꄉ，

ꈬꉙꈬꃪꌠꃅꑵꃚꌒꄉ，

ꂘꃀꏭꊼꇅꇗꅉꃅꂿꂸ，

ꂘꃀꈀꎭꀕꀐ，

ꉂꇁꅉꌠꂘꃀꈀꎭꀕꀐ。

ꉂꇁꅉꌠꂘꃀꎭꐪꆹꈜꀕꉉꌐꇁꀋꉆꀐ。

2018ꈎ9ꆪ20ꑍꄹꉇꁱꌠꉬ。